تدمير الجيوش :
شرط نوبل الغامض للحصول على جائزته للسلام
تقرير:ايمان مطر
لما توكل كرمان اخدت جايزة نوبل للسلام كلنا استغربنا هى عملت اية علشان تاخد جايزة زى دى وخصوصا ان بلدها دخلت فى فوضى وحرب اهلية وتقسيم وهى فرحانة باللى بيحصل وبتقول عليه ديمقراطية وتتمنى دا يبقى فى كل البلاد العربية .. بس حاتتفاجئوا لما تعرفوا ان توكل كرمان هى اكتر واحدة أنطبق عليها شروط نوبل للسلام بس مش الشروط المعلنة لكن شروط مبقوش يقولوها دلوقتى وبيتم الاختيار على اساسها.. اية هو الشرط دا .ومين الست اللى اقنعت نوبل انه يعمل الجايزة دى واخدتها بعد وفاته بتسع سنين دا اللى حانعرفه سوا النهاردة
تسريح الجيوش
بيتقال دايما فى اسباب منح جايزة نوبل للسلام لاى شخص انه ساهم فى اقرار السلام العالمى حتى لما منحو توكل كرمان الجايزة مشاركة مع اثنين ستات من دولة ليبيريا قالوا ان سبب الجايزة هو "لنضالهم غير العنيف من أجل سلامة النساء وحقوق المرأة في المشاركة الكاملة في أعمال بناء السلام" .. كلام مجعلص لكن الشرط الخفى اللى انطبق على توكل بصورة كبيرة هو (المساهمة فى تسريح الجيوش او تقليل عددها ) الشرط دا حطه الفريد نوبل ونشرته الامم المتحدة على موقعها الخاص وعرًفت الجايزة بانه بيتم منحها لمن بَذل جهداً في سبيل نشر روح الإخاء بين الأمم، أو ساهم في تسريح الجيوش أو خفض أعدادها، أو انشأ هيئاتٍ أو مؤتمراتٍ تروّج للسلام.
فى الاساس حكاية السلام دى مكنتش على بال نوبل لانه حط اربع جوايز تمس عمله كمهندس مباشرة وجت جايزة السلام فى المرتبة الخامسة وبعدين نوبل فى الاقتصاد الجايزة السادسة فى سنة 1968
مين بقى اللى شجعت نوبل على فكرة جايزة السلام ومن قبلها مين نوبل دا من الاساس ..
مين الفريد نوبل
الفريد نوبل اتولد سنة 1833 فى ستكولهم فى السويد وكان الابن الرابع لاسرة فقيرة وسط سبع اخوات تانيين .. ابوه كان شغال فى صناعة الالات والمتفجرات ولما اتحسنت الحالة المادية لعيلته شوية بعتوا الفريد يتعلم وهو اثبت شطارة وذكاء فى دراسته خصوصا فى الكيميا واللغات وسافر لباريس فترة وبعدها لامريكا لدراسة الكيمياء لمدة أربع سنوات، واشتغل فترة قصيرة مع جون إريكسون، وكان اول اختراع له عداد غاز فى سنة 1857 يعنى كان عنده 24 سنة ولما قامت حرب القرم بين روسيا والدولة العثمانية واستمرت 3 سنين من سنة ( 1853- 1856) كانت عيلة نوبل عملت مصنع لانتاج الاسلحة وبتورد للروس الاسلحة دى وبعد نهاية الحرب فلسوا وفى سنة 1859 اصبح المصنع تحت رعاية لودفيج نوبل الاخ رقم 2 فى العيلة وقام بتحسين ألاعمال بشكل كبير وكرس الفريد نفسه لدراسة المتفجرات، وفى سنة 1863 اخترع نوبل جهاز تفجير، وبعدها بسنتين صمم كبسولة التفجير.
وفى سنة 1867 اخترع الفريد الديناميت وهي مادة أسهل وأكثر أمنا للتعامل من النيتروجليسرين. وحصل على براءة اختراعه في امريكا وانجلترا وكان يستخدم على نطاق عالمي في مجال التعدين وبناء شبكات النقل. في سنة 1875 اخترع نوبل مادة الجلجنيت وهي مادة أكثر استقرارا وقوة من الديناميت،
وفي عام 1887 حصل على براءة اختراع الباللستيت
وتم انتخاب الفريد نوبل عضو في الأكاديمية الملكية السويدية للعلوم في 1884،
وحصل على الدكتوراة الفخرية من جامعة أوبسالا في 1893.
الفريد واخوته استثمروا في حقول البترول الغنية اللى على طول بحر قزوين وجمعوا ثروة ضخمة.
خلال حياته أصدر نوبل 350 براءاة اختراع دولية ، وقبل وفاته قام بإنشاء 90 مصنعا للأسلحة، على الرغم من اعتقاده في السلمية يعنى
التفكير فى الجائزة
في سنة 1891 اتنقل الفريد من باريس وعاش فى ايطاليا وبدأت صحته تتعب وجاتله ذبحة صدرية واتوفى فى بيته نتيجة نزيف دماغى سنة 1896 وبعد وفاته اكتشفت عيلته و اصحابه وزمايله انه كرس جزء من ثروته لتمويل جوائز باسمه
اية بقى اللى خلى الفريد نوبل يوصى بالجوايز دى
الحكاية ان لما اخوه مات وكان عايش فى فرنسا .. افتكر الفرنسيين ان اللى مات الفرد مش اخوه فكتبوا نعى بعنوان ( الفريد نوبل تاجر الموت يموت ) فدا خلى الفريد يفكر انه يعمل حاجة كويسة بعد مايموت وعلشان كدا كتب وصيته قبل مايموت بسنة وحطها فى النادي السويدي النرويجي في باريس.
الاكاديمية السويدية مكلفة باختيار الفائزين بخمس جوائز نوبل فيما عدا جائزة نوبل للسلام ودى كلف بيها البرلمان النرويجى لان السويد والنرويج كان بينهم اتحاد ساعتها وسر اختيار النرويج لان معندهاش التقاليد العسكرية زى اللى فى السويد. بالاضافة ان البرلمان النرويجى من نهاية القرن التسعتاشر بقى مشاركً بشكل كبير في جهود الاتحاد البرلماني الدولي لحل النزاعات من خلال الوساطة والتحكيم.
جائزة سلام غامضة
نية الفريد نوبل مكنتش سليمة برضه من ناحية جايزة السلام .. كان شايف ان الغاء الجيوش وتسريحها وتخفيض عددها هو الحل علشان يبقى فيه سلام عالمى ودى وجهة نظر غريبة اوى لواحد اخترع اسلحة وفضل يبيعها لغاية مامات ومقالش الغاء الجماعات الارهابية او محاربتها ودى كانت موجودة ايامه برضه زى جماعة الإخوان الجمهوريين الأيرلندية، وهي منظمة قومية أيرلندية، نفذت سنة 1880 هجمات بالديناميت اللى اخترعه نوبل.
صديقة نوبل صاحبة شرط الجيوش
مين بقى اللى كانت ورا اقناع نوبل بالجايزة والشرط العجيب دا؟
سيدة نمساوية اسمها برثا فون سوتنر( اللى اتولدت سنة 1843 وماتت سنة 1914.) عاشت حياة بائسة هى وعيلتها واشتغلت اكتر من شغلانة ومنها مديرة منزل وسكرتيرة لالفريد نوبل سنة 1876 وكانت بينهم صداقة حميمة وبعدين سابته واتجوزت عشيق ليها فى النمسا ولكن فضلت على اتصال بيه من خلال الخطابات وخصوصا لما بدات تكتب روايات فى الصحف وبقت ناشطة سياسية
وكتبت سنة 1889 كتاب اسقطوا الاسلحة واللى اتشهرت بسببه وبعدها بسنتين انشأت مؤسسة نمساوية للسلام واذا قرينا شروط نوبل للسلام حانلاقى انها متفصلة ليها لان من الشروط من انشأ منظمة للسلام ..
برثا كانت اول ست تاخد جايزة نوبل للسلام سنة 1905 بعد وفاة نوبل ب9 سنين ودا لان الجايزة بداو يمنحوها سنة 1901 واخدها اربع رجالة قبلها وكانت قيمتها ساعتها 22 الف و600 دولار تقريبا اما قيمتها دلوقتى فوصلت ل مليون و100 الف دولار امريكى .. متهيالى فى حاجات كتيرة وضحت قدامنا دلوقتى عن الجايزة دى.
